سئوگی آماناتیم

تورال دئییردی بیز کدده بئش اون نفر اوغلانی اوشاغی یاشید تای اولماقیمیزا باخمایاراق؛هره میزبیر قیزی گوزموزون آلتیندا یاتیردیب؛هر کیمسه یولداشلارینا  اوز توتوب اوقیزی من آلاجاغام دئییه کد کوءشن آرا شیلاق آتیب یاشاییردیق؛امما بو قیزلارین ایچینده هاممیسیندان حاللی باللی اولان فاطما منیم دیقتیمی چکیردی؛فاطمانین سوزگون گوزلری کورپو قاشلاری اوست دوداغینداکی قارا خالی سانکی ائلات قیزینین گوزلیگین و هورککلیگین گوزومده جانلاندیریردی؛بو سوزو اوره ییمده سیر ساخلایاراق هیچ بیر کیمسه یه آچیقلاماق ایسده میردیم؛نیا کی فاطماائللی طایفالی اولدوغونا گوره بیر آز چکینیردیم؛امما آییری اوشاقلار بو قیزین اوسدونه آد قویماسین؛بیر ایکی یول گلین باجیما(قارداشیمین خانیمینا)اوتری یئتیرنده کی من فاطمانی ایسده ییرم اودا گولوب سوزدن واز گئچیردی؛ هردن گوز اوغورلاییب فاطمانین بیلاغاسووا گئتمه یین گوزله یینده دالینا دوشوب نفسیم یئریشینه باغلیقی اولدوغو قیزین منیم گله جک حییاتیمین ایشیقی اولاسینا اورک باغلاییردیم؛گونلرین بیرینده قورخونو اوزومونن اوزاق ائله ییب فاطما سئی چه چئی نینده بیلاقدان گله نده بیله سینی یانالاییب قاباغینا دسمال آتاندا سنی سئویرم دئییه هیجانلانیب اوره ییمین تئز تئز ویرماغینان بیر کیمسه گورمه سین بیله سیندن آرالاندیم؛اوسدونن بیر ایکی آی گئچندن سونرا بیر گون قوزو اوتارماقدان گلنده فاطمانی گوردوم قوزوموز ایتیب دئییه منه یوخونلاشاندا وئردیگیم دسمالی یئره آتیب یولونا داوام ائله دی؛هویله سک گوتوروب دوشومه سیخاندا گوردوم؛گله جک باخدیمین اولدوزو گوزلرین گوزلی فاطما اینجه بارماقلارینان دسمالین دورد بیجاغینا یاشیل ساپ ساچاق دوزمه یینن آراسیندابیر گول بوتاسی قویوب؛اوچاغ دان بری هردن یال یاماجدا گوروشوب اورک دویونتلرینن آداق بازلیق ائلیردیک؛فاطما ایله سون شرطیمیز بئله قورولدی کی من عسکرلیگه گئدنن سونرا آتا آنام ائلچی گوندریب سنی آداقلایاجاغام دئییه اوزون ساچلارین سیخاللایا سیخاللایا آلنیندان اوپنده قارداشیم گلر دئییه الیمنن قوتاریب هورورکک جیران کیمین ائولرینه ساری دابان آچدی؛طالع بئله گتیردی کی 1993 اوچونجو ایللرینده قاراباغ جیبهه بولگه سینه عسکرلیگه چاغیریلدیم؛وطن کئشگینده دورماغی اوزومه بورج بیلن کیمین آشیریمدا(سنگرده)آفداماتی دوشمانا ساری توتارکن گاهدانداساچاقلی دسمالی جیبیمنن چیخاردیب اینسی له ینده فاطماینان گله جک قوردوقوموز حییاتین پیللارین توکوردوم؛قویدوقوموز قارال کیمین بیر ایل عسکرلیگیمی سوواندان سونرا آنام گیل فاطمادان ائلچی لیک ائله ییب اونلاردا هه  دئییه سئودیگیم قیزی منیم اوچون آداقلامیشدیلار؛هردن واقت آشیری باش ناظیردن واقت آلیب ائوه قاییداندا آداقلیمین منه یازدیقی سوز سیرالارین بیرلیکده اوخویوب اوپوش گوروشنن عوروموزدن کام آلیردیق؛سون واقتدا ترتر بولگه سینه قاییدیب دویوشچی یولداشلاریما قوشولاندا گئجه قارانلیقی آرایا گلرکن قددار ائرمنی لرله آتیشما باش وئرنده دوشومنن یارالانیب اولوم آنلاریمدا توپراقلا قوجاقلاشا قوجاقلاشا فاطمانین ساچاق دوزدوگی دسمالی بایراق عوضینه یارالاندیقیم سنگرین اوسدونه ساچدیم کی سئوگیمی وطن توپراغیما آمانات وئرمیش اولوم .............

تبریز یارالیدی

خالقیمیزین قارلی قادالی تاریخیندان اولان1325 اینجی ایللرینده آنامین دایی سی ایکی اوشاغین آتاسی اولماغینا باخمایاراق پیشه وری حرکاتیندا فدایی اوردو سرکرده سی اولدوقونا گوره ایکینجی قددار پهلوی شاهی نین الینن دارما داغین اولموش اولکه میزدن ایتگین لیگه معروض قالمیشدی؛اوزون ایللر قارداش دئییب آغلایان چیچه ننه م هر گلیب گئده نین اوسدونه گوز یاشی توکوب یانا یانا قارداشی نین سوراغین آلیردی؛دایی نین جووا نزن حیات یولداشی دا ارینین اولوم دریم حیاتیندان خبرسیز قالاراق اوز کورپه بالالاریناهم آنالیق همیده آتالیق ائدردی؛یادیمدادیر بویوک ننه م عورونون سون ایللرینده  انزلیده بیزه قوناق گلنده بیر گون الیندن یاپیشیب دنیز کانارینا آپاراندا گوردوم چوخ کدرله الینده کی چه لیگینن خزرین جوشقون سویونو گوستره گوستره دئییر آی ظالیم سن قارداشیمین سندن قارداشیمین ایی گلیر؛بو سفر ائله ایرحمتدیگین بیزیم له سون گوروشو اولموشدی؛بیلدیگیز کیمین 1369 اینجی تاریم رودبار زلزله سینده بوتون دونیادان آخین ائله ییب تاریم گیلانا گلن یاردیم چیلارین ایچینده قوزی آذاربایجانلی یاردیمچیلاریدا گلیمشدیلر تصادوف اوزنده عاکیف آدلی بیر یوک داشییان ماشین سوروجو سیله تانیش اولوب ائویمیزه آپاردیم؛آنام قوناغین کیم لیگین بیلندن سونرا دایی نین ایتگیسی حاقدا قوناقلا دانیشقلار آپاریب دایی نین بویون بوخونون اوزونده کی نم نیشانین دئییب قوتاراندان سونرا آخریدا یالوار یاخار ائله دی کی اگر دمیر چپرلر آرخاسیندا بئله بیر کیمسه نی تاپا بیلسه خبر ائله سین؛ سحر تئزدن دوروب بیزینن ساغ اوللاشان قوناق بیر تلفن نمره سی مندن آلاراق یولداشلاریندان دالا قالماسین یولا دوشدی؛بو حکایه نین اوسدوندن اون اون بئش ایل گئچندن سونرا بیر گون منیم ایش یئریمه تلفون زنگی آچیلدی بیر آز سالاملاشیب سیز کیم سیز سوراندا قارشی طرفدن  جاواب گلدی باکی شهریندن سیزی نایراحاند ائله یین عاکیف کیشی دیر؛سئوینه جک نئجه سینیز خبر آلاندا دایانمادان سوزومو کسیب دئدی ایتگین دایی نیزی اوشاقلارینی باکی نین اوجقار قصبه لرینین بیرینده  تاپیب سیزه زنگ آچمیشام؛درست نم نیشانلارین آلاندان سونرا تئز ائوه گلیب بو گوزله نیلمیز خبری ائل طایفا آراسیندا یاییدیم؛بو حادثه دن سونرادایی نین اوشاق لارینان آزچوق تلفون بالانتیلاریمیز اولوردی؛1992ایکینجی ایللرینده اس ای سری(شوروی) داغیلیب قوزی یین باغلی یوللاری آچیلاندا گونئی دن بیزیم آق ساققال طایفا باشچیلاری بیر نئچه نفر اوتایا گئچیب دایی نین اوشاقلاریلا گوروشوب قبرین زیارات ائله ییب گلنده چوخلو شکیللر گتیرمیشدلر؛اوسدوندن بیر نئچه واقت گئچندن سونرا آنام منه اوتایا گئتمه یی تکلیف وئرنده بیر زیارات سفری کیمی اوزومه بورج بیلیب گونلرین بیرینده بیر آز پای پوشک گوتوروب ننه بالا ایتگین دایی نین مزارین گورمه یه باکی یا یوللاندیق؛قارشیمیزا چیخان دایی نین اوشاقلاری آلقیشلا بیزی ائولرینه آپاریب  نئچه گون قوناقلیق ائله یندن سونرا بیر گون آجی بیر خبر ائولرینه چاتارکن گوردوم هامی تبریز دئییه اوزلرین بیرا اورا ویریب آغلاشیرلار؛ایشین سببینی سوروشاندا دایی نین اورتانجیل گلینی آنامین بوینون قوجاقلاییب آغلایاندا گوردوم دئییر کی نه اولاجاق تبریز یارالیدیر؛بو سوزو ائشیدنده تعجوبلنرک دئدیم تبریز کی بوتوی آذاربایجانین باش کندی دیر؛خیلاصه بیر نئچه نفرتانیشلارینان اوزموزو قاراباغ جهبه بولگه لرینه یوخون اولان خسته خانالارینا بیرینه یئترنده گوردوم دایی نین تبریز آدلی اوغلان نوه لریندن بیری ائرمنی داشناکلارینین گولله سینن یارالانیب؛بیر آز سفریمیز یوبانارکن ائودن زنگ آچانداکی نییا گلمیرسیز آنام باش گوزونه ویرا ویرا گونئی ائل طایفایا یئتیردی کی نه اولاجاق تبریز یارالیدیر................................  

2016اینجی آپریل آییندا قاراباغدا شهید اولان ایگید اوغلان وقیز قوچاقلاریمیزا ایتحاق یازدیم