گؤر با گؤر اؤلو...............

گؤر با گؤر اؤلو..................

بیزیم  بو ترس آوا کندی ایسلام دونیاسی نین بیر پارچاسی اولاراق جاماهاتین یاری سوننو یاری شییه اولدوغلارینا گؤره هردن بیر زادی بهانه ائله ییب قان توکمه ویریشارلار؛ بو دونه  یوخاری باش سوننو عایله سینن اولان گنج خیدیر قولو آشاغی باش شییه عایله سیندن بیر قیزی سئویب اوننان عایله قورماق ایسته ییردی؛ مین بیر چتینلیکلرینن اوزله شن گنج اوغلان اوچ دؤرد ایلین ایچینده نئچه یول کند ایچی سوننو شییه داوا دالاشینا سببکاری اولسایدیدا نهایت کی بیج بالالیغینان قیز عایله سینین ایسته یین بویون اَییب شییه چیلیک اینانجی نی قبول ائله مه ینن ایسته ینه چاتا بیلیر؛عایله قورماق بیله سینه باها قورتاران خیدیر کتده یاشایا بیله جه یین گؤزونه آلیب واقت آشیری شییه لر مچیدینه گلیب جانامازین سویا چکنده یوخاری باش جاماهاتینین قیناغینا معروض قالیردی؛هر ایکی طایفا مچید منبر و قبیرساندیقلاری آییری اولدوغونوگؤره اؤز اینجانلارینا اویغون گونده لیک شرعی ایشلرینه داوام ائله ییردیلر؛لاپدان سوننولر مچیدینده آذان وئریب شییه لر مچیدینده الم گؤتورن خیدیرقولو گئد گئده توره مه سی آرتیب اکینه جک یئر صاحابی اولدوقجا کند ایچینده وارلی کارلی آداملار سیراسینا دوشور؛آلتی یئدی کوره کن و اوغول آتاسی اولان خیدیر بیلدیگیم قارنیمدا دئییه دونه دونه مئشده گئتمه ینن آرواد طایفاسی  نین گؤزوندن یایلیق آسیردی کی من سیزدنم ؛یاشی سَکسه نی اوتن عایله باشجیسی گئچن ایل یای اراده لرینده عومرونو سیزه وئریب دونیاسی نی دییشنده آرواد و اوشاقلارینین سرانجامینان شییه لر قبیرستانیندا باسدیریلیر؛گلیب گئدن  قوناغین ال ایاغی چکیلیب   قیرخی زادی چیخاندان سونرا اؤز یوخاری باش آتابابا آدام نفری وریندن بیر بارماق باسما وصیت نامه سی تاپیلیر کی خیدیر قولو او کاغیذدا یازدیریب  من آتا بابا دینیمنن دونمه میشم؛اودور کی یوخار باش سوننولر ایجماسی بو یازینی الده ائله یندن سونرا گئجه ینن قبیری یاریب اولونو اؤز قبیرستانلاریندا کومله ییرلر؛ایشی بئله گؤرن آشاغی باش شییه جاماهاتی یوروش ائله ییب اولونو قبیردن چیخارداندا منی یوللادیلار شهردن بیر دین خادیمی زاد تاپیب گتیریم؛نم نیشانین دوز گلن کیمین حورمتلی دین خادیمینی بی ادبچیلیکدی اولاغا میندیریب یول اوزونوگله گله صوحبت گئدنده لاپدان آغزیما گلن کیمین سوروشدوم  کی آی آغا شرع موققدس ده بو ایشه نه دئمک اولار؛جانینا قوربان اولدوغوم دین خادیمی دومما گؤزلرینن منه باخیب گولومسه ینده دئدی بونا دئییرلر...............

کوره که نی.......................

کوره که نی..............

آی خانیم سالام علیکوم نه عجب بو آخشام ائوده سن؛اشی اللی یول دئمیشم فتقیمین یئللنمه ینه گؤره داها آغیر شئی گؤتوره بیلمیرم گل بو الیمده کی یئر یئمیش نایلونلارینی آل تویوشومو دریم؛

آرواد قاش قاباغینان چیخیب باساغین(پیلله) باشینا بارماغینی بورنونون اوجونا قویاندا آندیرکی قونشولار ائشیدر؛

مین نوصیبتینن ایچری گئچیب پالتاریمی سویوناندا  سوروشدوم به قیز هاردادیر؛

بو دونه گوله گوله دئدی هئچ آداقلی سینا چوله گئدیبلر؛

 باش گؤزومو یوواندان سونرا خان قیزی خؤیلو خانیم دسترخانی سریب دوغراما دوغاسینا چوره گی ازه ازه دئدی اشی سن نه باشی سویوق آدامسان اوغلانین آدام نفری ایزنگ آچمیشدیرلار کی یایین قوتاراجاغی قیزی آپاراجاقلار؛

  دئییرم بیر آز پول پارا وئره سن اوشاقلاری گؤتوروب باش کتدن اوغلانا ایاق قابی اؤزومه ده باش ایرنگینن  توتموش صونعی دیرناق زاد آلیم؛

اؤز کالا کؤتورال دیرناقلاریمی گؤزومون قاباغینا توتوب آغزیم یانان کیمین دئدیم خانیم یانی سن بویوران رایوندا بازارچالاریندا  باش ایرنگی  زاد اولماز کی باش کنده گئدیرسن؛

سیفرانین باشیندان ایاغا دوروب دیل دوداغین گمیره گمیره گؤردوم دئییرکی آخی سنده کیشی سن عایله ده ائله قابیقلی قؤز (گیرده کان)کیمین دیرباخ؛

دؤردونجو قاشیغی دوغادان دؤلدوروب اؤردوما چکنده دئدیم خانیم آخی عایله نین قؤزا  نه داخلی وار؛

سویدوجودان ایکی  تر خیار گتیریب دوغاما دوغرایا دوغرایا علاوه ائله دی آی کیشی بیزیم دری دونیادا بیر قیز و بیر کوره که نیمیز وار من اؤنلارین تویوندا گئیینیب گئچینیب سیندیرماسام هئچ اولار؟

یئمه گی یئییب قاب قاجاغی ییغیشدیراندا وورقولادی کی صاباحلاری ایشدن بیر آز تئز گل کی یئدینجی قونشوموزماه زر خالا اوغلون کسدیریب اؤنون یانینا گئده جه ییک؛

خیلاصه گئجه گئچیب باشیمی یاسدیغا قویاندا آروادین عزیز گیرامی سی اولان کوره که نین شکیلینی تاقچا اوستونده گؤرنده اؤز اؤزومه فیکیرله شیردیم کی منکه ایکی ایل آداقلی قالدیغیمدا بیر یول ایمکان تاپیب آروادین دده ائوینه گئده بیلمه دیم بس بیزیم بو کوره کن .................................؛

خوروز بانی دئییه یوخودان دوروب نامازی زادی قیلاراق قاپیدان چیخاندا آرواد بیر ناخیر نوباسی کیمین یازیلی کاغاذ الیمه وئرنده گؤردوم بیر باشدان یازیب؛

 بئش کیلو قوزو اتی؛ دؤرد بسته ماکارون ؛کیلو یاریم لپه ؛بیر کیلو نوخود؛ اوچ بسته ال کاغاذی؛ ایکی قوطو باش و ایاق قابی یاغی؛ بیردنه ده دنه فیرانسیس مارکالی یئنی ایپار(ادکلن)؛دیرناق توتانی اوستونده؛

قاپینی اؤرتوب یولا دوشنده  دالدان های باسدی کی  ایکی اوچ کیلوودا قارا بادیمجان..............

ایش یئریمه گلیب تزه گلن اؤلولرین سیاهی سینی یووشا(قلم)آلاندا آروادین سوزو بیلمه می توتان کیمین فیکیرله شیردیم کی جانیم عایله نین قوزا نه داخلی اولا بیلر؛

آخشاما یوخون مورده شورخانانی باغلاییب جیبیمده کی پولونان آروادین وئردیگی سیاهی نی وارا وورد ائله یه ائله یه آز چوخدا بازارلیق ائله ییب ائوه گلنده گؤردوم بللی منن قاباق کوره کن نبه نی آلدیریب؛

آرواد تر تله سیک الیمده کیلری آلیب منه محل قویمادان آچدیغی ناغیلین باشینی یاریم قیچ شالوارلیغینان اَییلشمیش کوره که نی چین خیردالایا خیردالایا  بو یان اویانینا گئچیر؛

بیر آز چاغ گئچمه دن قوناغین شرفینه ماسانین اوستونه جوره به جوره یئمک لر دوزوب عایله عوضولری سیفرانی دوشلشدیرنده  منده آروادین قولتوغو آلتینان سوخولوب بیر اوستولو آلتیما چکه رک خیردا خیردا یئمه باشلادیم؛

شام یئییلیب علاوه دن یئمیش(میوه) زاد ماسا اوستونه دوزولنده سوز ماززاقلیغا چکیب آرواد قوناغی آرتیق شنلندیرمه ایچین آتماجالار آتیب بیرلیکده گولوشرکن؛

لاپدان گؤزلریمی کتللی(یاش قابیق) قوزا ذیلله نمیش گؤرنده لوغالانا لوغالانا  الین آتیب یئکه دنه سینی گؤتورنده بیرینجی قابیغینی سویوب منیم قاباغیما قویاندا دئدی بوائوین کیشی سیدیر؛ایکینجی قابیغینی سویوب اؤز قاباغینا قویاندا دئدی بو ائوین قادینی دیر ؛اوچونجو قابیغینی سویوب قیزین قاباغینا قویاندا دئدی بو ائوین اوشاغیدیر قاخلاییب ایچین چیخارداندا ایاغا دوروب اوجا سسینن دئدیم اودا ائوین......................

گؤرر....................

گؤرر..............

ایل اوزونو قالایچی مورتوض آراسیرا سیرا کؤت تاپیب ایسلامی حوکومتیمیزین آچدیغی قهبه خانالار یوخ  باغیشلایین چاشدیم سیغه خانالاردان دیرناغی رگلی زاد تاپیب کئف گوذار ائله ینده حییات یولداشی خویلو خانیم ایی بیلن کیمین نئچه یول باش یولوب قاب قاجاق سیندیرما داوالاری دوشنده  بیله سینی نهی از مونکور ایداره لرینه چکیرکی بو ایشین باشیندان چیخارتسین؛ایل اوزونو دونه دونه ایشی نهی از مونکور ایداره سینه دوشن قالایچی مورتوض یول یولاجاغی باشا دوشن کیمین یوخ ایمانیم حاققی دای ائله مه رم دِئییه ضمانت قویمادان اؤزون قورتاریر؛امما  بو دونه خویلو خانیم بیر ساچی قیوریملی سینیان  بیله سینی گؤروب علاوه دن داوالاشما لارینا کوچه جاماهاتینی  یغیشاندا قالایچی ایشینی چاش گؤروب آرادان چیخمالی اولور؛نئچه گون آرالیغدا سفیل سرگردان گزیب بو اولایین آلتیندان قوتاراجاغینا فیکیرله شنده ...........؛خویلوخانیمین شیکایت عرفه سینده بیرگون110 تعجیلی پولوس امکداشلاری  وریندن یاخالانیب اَر آرواد یئدینجی دؤنه مونکورات ایداره سینه گئتمه لی اولورلار؛بو توتوقلانمادا اوزون موباحیثه لر اولدوقچیون تشکیلات باشجیسی شیخ آغا بو دونه قالایچی نی هده له ییب  ضمانت زاد ایسته یین ده مورتوض دا قاباقجادان عملیات ائله ییب چیخاردیغی کیشی لیک یومورتالارینی قولتوق جیبیندن چیخاریب آروادین گؤزونه سوخا سوخا میزین اوستونه قویاندا بوینون اَییب دئییر حاجی آغااااااااااااااا....................   

دِئیینده..................

دِئییندَه..............

اویناغان جاماهات یئنه یئییب قودوروبلار هااااااااااا؛باش بیلن شیخ آغا یوخ ائله دده ددلیگیمین اوزون گؤرن لیگینن اینقیلابدان بری  ایران ایسلام اولکه سی گوندن گونه اینکیشاف ائله ییب ماخلوغون کئفی سازلاشاندا  بو دونه خیاوانا توکولوب قودورقونلوق ائله ییرلرکی نه وار نه وار گاز؛سو؛برق؛ ارزاق باهالاشیر؛بو نانکورلار دینن دوننان چیخیب  اعتراض آکسی یاسی گئچیرنده یازیق ددده ددلیگیم گئجه لری یاتماییب طییییییی هیجان گئچیریرکی  الله ائله مه میشدن حوکومتیمیز یوخ باغیشلایین چاشدیم سیغه خانا ایرئیس لیگی الیمیزدن .........دریسی یوسما قوجاکیشی ائله قورخوب کی دال قاباقدان چوله گئده بیلمیر؛جانینا قوربان اولدوغوم اوگونلری مانققال اوستونده الی تیتره ییب اوزو قویلو یخیلاندا دوره قونشو زننلری یغیشیب بوغازینا سو زاد توکنده بو قناعته گلدیلر؛طییییییییی دویلت میللت ایشینه قاتیلیب پارتیمیز اولان شیخ آغا قورخوب نئچه گوندور کی منده موم یای زاد ازیب قارنینا یئریدیر کی هئچ اولماسا بیر طرفدن چوله گئده بیلسین؛

نه دئییردیم – هه یادیما دوشدو

قدیم زامان ترس آوا کند ساکینلی اوغرو شیخ علی شیل علی قارداشلاری عاغیل عاغیلا وئریب ؛ گئجه قارانلیغیندا  هئچ کیم بیلمه سین خانین په یه سیندن(طویله) اوچ ایللیک قارا قوچو گتیریب باشین کسه رک قؤورمالیق ائله ینده  خان ایی بیلن کیمین ایکی قارداشی قاندالاییب جازالاندیرماق اوچون طویله سالیب قاپی باجاسینی دارلاییر؛ ال قولو باغلی ایکی قارداش اؤزلرینی باغلی  قاپی آرخاسیندا گؤرنده گاهدان تپیکله شیب شیخ علی اوزون بویوک قارداشا توتوب دئییر وای کوپک اوغلو ددن بئله بئله  سن ائله دین؛گاهداندا شیل علی اؤنو تپیکله ییب عین سوزلری ......................

اولماسیندان......................

اولماسیندان.............

مئشه ده بیر عایله تولکونون دده لری اؤلور؛هر نقدر  دوره بر آغاجلارا اعلامیه زادیاپیشدیرارلار هئچ کس گلمیر؛آخیردا چاراسیز قالیب دال دالا وئررک هره سی بیرطرفدن هنده ورده اولان حیوانلارا موراجعیت ائله یینده؛ قارداشلارین بیری آسلان گؤروب الین دوشونه قویاراق دئییر ای شاهلار شاهی بیز کی سنین  قولاغی داغلی بنده نیک مچیده تشریف بویورویوب منبر یانیندا اوتورارسیز؛آسلان کی گؤتو اوسته اؤتوروب قویروغوینان ملچکلری قاوالیردی لاپدان شیغیر  اوستودونه کی یئری یئری من او توممه تینین زیانکارلیغین بوینوما آلا بیلمه رم؛؛او بیری قارداش گئدیب بیر آیینی گؤررکن آرخالیغینین قولوینان بورون فیرتیغی نی سیله سیله دئییر ای اصل نئجابتده تایی اولمایان دده مین مجلیسینه گله سن؛آیی دا کی آرخاسی اوسته اوزانیب اؤزونو گونه وئرمک دئیدی لاپدان حیرصی توتانلار کیمین یئریندن  دوروب اوستونه جوماراق دئییر یئری یئری من زیربازیرین اوغورلوقلارینا شریک اولا بیلمه رم؛ او بیری قارداش گئدیب بیرچاققاللا راست گلنده باشینا دویه دویه دئییر آی عم اوغلو دده م اولوب یاس توره نینه گله سن؛چاققالدا باشین قالدیریب  بیر اؤنکورمه چالاراق دئییر گئد گئد من او گؤر باگؤرون حیله لرینه قاتیلا بیلمه رم؛ او بیری قارداش دولانیب بیرخوروزا راست گلنده گؤزونون لیلیغین آخیدا آخیدا دئییر آی باشی جیققالی دده مین حوزنونه گله سن؛خوروزدا بو سوزو ائشیدن کیمین ایکی قاناتلارینان قوزانیب قوت قوت قودا؛قوت قوت قودا بونون اوستونه جوماندا دئییر گئد گئد من او گؤر با گؤرون اورشووت خورولوغونا شریک اولا بیلمه رم؛ ؛قارداشلار کور پئشمان قاییدیب اؤلولرینه اوستونه گلنده بالاجا قارداش گئدیب بیر موللایا راست گلنده اللرین گوبه یی اوسته دویوگونله ییب باشین آشاغی سالاراق دئییرکی ای یارانمیشلارین بیرینجیسی دده مین خش خییراتینا گله سن؛موللا تر تله سیک اؤتدوغو سکی نین اوسدن دوروب ایچری گئچنده قال باشیما سو آتیم دِئییرَک عبا عمامه سینی گؤتوروب یولا دوشنده شرعی مسئله اولاراق بیر خیلک جاماهاتدا دالینا دوزولوب تیرلنمیش اؤلونون جاه جالالینان نامازینی قیلیب توپراغا تاپیشیراندا بئله یئدی سینه کیمین هر گئجه مچیده سیفرا زاد ییغیشاندان سونرا منبر چیخیب او ایرحمتدیگین  مومن موسلمانچیلیغیندان؛ اؤروج  توتوب ناماز قیلماسیندان؛ بؤلگه ده گؤردوگو خییره ایشلریندن؛ دوروستکارلیغیندان؛خالقا ال توتماغیندان؛شرعی مسئله لریسینی بیلمه سیندن؛خومس ذکات وئرمه سین؛ناماز جومعه ده حاضیر اولماسیندان؛سوریه دویوشونده ایشتیراک ائلمه یندن ؛ارسیز آروادلاری اؤز حئسابینا زیاراتا آپارماسیندان؛تنگه باجادا نهی از مونکور ائلمه یندن؛امیر که نین ایسیرافیلین قاباغیندا دیرنمه سیندن؛ایللاه کی شیعه ....................