چیلله ننه...............

چیلله ننه...............

اسکی چاغلاردان خزل آیینین سون فصیلی دئییه اون یئدی سیندن باشلاییب اون سکگیزینجی گونلرینه قدر *تَکَه قاری یاغیب جاماهات بیربیرلرینن سیخلاشارکن شر قووه لر طرفیندن گونشین توتوقلانماغین دئییب یئر اوزونو قارا باسماغینا اینانیردیلار؛

بو اینانج لا یاشایان اوجقار بیر کند جاماهاتی نین داملاری بیربیرینه سویکه نیب یوللاری اولسایدی دا کتدن قیراقدا دام دئشی اولان چیلله ننه تک یاشاییب عومور گون سوروردو؛

دری دونیادا بیر ائششگی و اون ایکی قازی اولان قاری ننه یای یاز گونلری اولاغینی دوره برقونشولارا کرایه وئریب آز چوخ خیردا دنه آلاراق قیش گونلرینه زومار ییغاندا قاز یومورتالارینی دا ساتانی ساتیب قالانینی چورک یاوانلیق ائلردی؛

هر ایل تَکَه قاری نین یاغماغین گورَن کندآدامی ایده دن؛گوزدان آلمادان گوتوروب قاری نین ائوینه توپلاشارکن گونون گودلمه سیندن دئییب یئر اوزونو قارانلیق باسماغینی بیر بیرلرینن پایلاشارکن قورتولوش یولونا نذیر نیاز ائده دیرلر؛

 لاپدان دانیشدیقلاری ناغیللارقورخولو اولسایدیداگئجه گئچن کیمین ائولرینه اوز توتاندا چیلله ننه دن ایشیقلیق داوامینا خئییر دوعا آلیب گئدردیرلر؛

امما سون ایللری آغیر قار اوجو باتینان  چیلله ننه دن خبرسیز اولان کند آدامی بیرگون  قالایچی موتوض آلتدان اوستن گئیینیب قاری ایاقلایا ایاقلایا گلیب چیلله ننه نین دامینا چیخاندا اَییلیب باجادان سس سالیرکی آی قاری ننه آی قاری ننه گون اوزانارمی؟

دوغوم گونون یاخین گورن چیلله ننه قالایچی نی تانییب اوجا سسینن دئییر گئد منه بیر یئمیش گتیرکی ایچین اوزوم یئییم قابیغینی ائششگیم یئسین دنه لرینده قازلاریم؛قالایچی قاییدیب آز چوخ تپرینج ائدندن سونرا بیر دیبیر قارپیزی چانتایا سالیب علاوه دن قار اوستو یخیلا دورا گتیریب قاری ننه نین باجاسیندان آشاغا ساللاییر؛

اودورکی قاری ننه بیر قارپیزی دورد حیصصه یه بولنده  ایچینی اوزو یئییب قابیغینی ائششگینه وئرنده اوچ یوز آلتمیش  آلتی دنه سینی ده قازلارینا زومار ائله ییر.......................

____________________________________

*(تکه قاری) نین ایضاحی: هر ایل پاییزین سون آیی اولاراق اؤن یئدی گئجه سی تکه بیر چول حیوانی اولاراق اؤن سکگیزین گونونه گئچنده  اؤز دیشی سینی تاپیب موطلق  اوننان جوتلشمه لی اولار؛ و او گونلرده کولک قاریشیق یاغان قارین آدینا ائل آراسی تکه قاری دئییب اسکی چاغلاردا بیلرمیشلر کی پاییزدان اؤن ایکی گون قالیبدیر و بو حیوانلارین جوتلشمه عنعنه سی اؤزو طبعیتده  بیر قریزه اولاراق موطلق او گونده باش توتمالی ایمیش هر حالدا ارکک تکه اون سکگیزینی گونو اوز دیشیسینی تاپیب جوتلشمه سئیدی گلن ایل  اوگونه قَدَر گوزله مه لی اولاجاغیدیر؛

ایشیق دیره گی..................

ایشیق دیره گی............

1970نجی ایل آقای معللیمین گئدیگی کند اوجقار اولدوغو اوچون قیش آیلاری قار یاغیب یول یولاغی باغلامیشدیر؛امما کند یئنی یئتمه اوشاقلاری مکتبه یغیشیب درس لرینی اوخویاراق وئریلن تکلیفلرینده هوس له یئرینه یئتریردیلر؛اوشاقلار مکتب دن قورتاران کیمین تنگه باجانین قاربورانینا باخمایاراق چول باییردا قار گولله سینن توتموش زولاخ سوروشکنلرینده اویناییردیلار؛اوغلانلارین ایچینده آناسیز موراد ادب ارکانینا گوره آقای معللیم دیقّتین چکیب و بو اوشاغین گله جکلی اولدوغونو دوشونوردو؛قضا ایشی ترس گتیرن کیمین موراد بویوک چیلله اراده لرینده آغیر خسته له نیب یورقان دوشه گه دوشور؛ کند تورکه داواسی ال وئریشلی اولمایاندا گئد گئده آغیر قیزدیرمالاری اوشاغی امنن سالیب اولوم له اوز به اوز قویور؛نهایت کی مورادین آتاسی چاراسیزلیقدان قیشین قار کوله گینه باخمایاراق آلتدان اوستن گئیینیب  سارقین بالاسینی یورقانا بوکه رک اوزونو قارلی یوللارا ویریرکی بلکه شهره چاتدیریب دردینه درمان ائله سین؛آقای معللیم مورادین یالقیزجا اولوم دیریم آنلارینی گورنده بیر ال آغاجی گوتوروب اونلارا قوشولاندا گونن بیرآز ایشله میش کتدن چیخیب شهره دوغرو یول باشلاییرلار؛یول اوزونو آقای معللیم قاری ایاقلاییب زولاغ آچان کیمین باتا چیخا یول گئدیردیلر؛هاوا قارانلیقلاشیب یوللارینی ایتیررکن بو دونه اوزلری  قضایا دوشوب سویوق ال ایاقلارینی آپارارکن آقای معللیم سَرت سویوغا دوزه بیلمه ییب اوتوردوغو یئرده جان تاپیشیریر؛حاقدان عومورو اولان اولمز دئییه مورادین آتاسی بالا قوجاغیندا گونش چیخانا کیمین اولومنن ال به یاخا اولسادا آتا بالاتویوش تویوشه(نفس) وئریب ساق قالیرلار؛ قارقا قوزقون ییغیشماسین گورن یول کروانی یاردیمنان شهر خسته خاناسینا چاتدیریلیب هله لیک آتانین ال ایاغین سویوق آپارسادا حکیملر بالاجا مورادین قاداسی نی قاملاییب درمان ائله ییرک اولومنن قورتاریلار؛اودور کی موراد بویویوب عالیه تحصیللی اولاندا اوروپا اولکه لرینین بیرینده طبابت ایشینه مشغول اولور؛موراد باشینا گلن بو اولایی اوزونده یاشادان کیمین نئچه ایل قاباق عایله سی له بیرگه اولکه یه قاییدیب کنده اوز توتاندا آقای معللیمین آدینا گئدیگلری یول آیریلیغینیدا بیر ایشیق دیره گی قویور کی قیش یولونا چیخان کیمسه لرین قارانلیق یولونا ایشیق سالا بیلسین....................

________________________________

بو حیکایه نی ایلک صینیف معللیم سورو غلامحسین قیزی(ثریا جهانگیری)خاطیرلایاراق آدینا حصر ائله دیم

آتا اوجاغی....................

آتا اوجاغی.............

 پیرمان کیشی ایرحمت دیک ایلک حیات یولداشیندان اولان سون بئشیک قیزینیدا ار ائوینه یولا سالان کیمین قاییدیب ائوده اونکور اونکور آغلاییردی کی بوندان سونرا چیراغیمی کیم یاندیراجاق؛یاشی نین آلتمیش بئش ایراده لرینی یاشایان پیرمان کاسیب عایله اولماغینا باخمایاراق تک باشینا قالماییم دئییه ایکینجی دونه ائولنمک قرارینا گلیر؛دونیا مالیندان  تکجه بیر حَیَت ائوی اولان پیرمان گاهدان قوجالیق گونلرینی گوز اونونه گتیریب اللرینی اوکله ینده نسه ایشیقلی بیر گله جه گه اومود باغلاییردی؛ اودور کی بیر ایکی ایلین ایچینده  تانری بو یاشلی جوتلوگه بیر اوغلان اوشاغی بخش ائله ییر؛ آنادان چوخ آتاسی نین سئوینجینه سبب اولان کورپه یه علیرضا آدی وئریرلر؛امما طالعین سَرت اوزو توتاراق علیرضا ایلک صینیف مکتبنه گئدنده آناسی دونیاسینی دَیشیر؛گئد گئده پیرمان کیشی یاشا دولوب آنکفاقت اوجو باتینان دوررومونو ایتیریب داییمی یورقان دوشگه دوشمه لی اولور؛ علیرضا یئنی یئتمه اوشاق اولماغینا باخمایاراق خسته آتاسی نین قاییدینا قالیب گون اوزو مکتبه گئدرکن تئز صینیف داشلاریندان آرالانیب ائوه چاتان کیمین گوزو قاپی دا اولان آتاسینین یئمه گینی وئریب خیردا باخیشلارینان بویوک بیرایشی اوزرینه گوتورور؛ آتادان بیر باجیلاری آییری شهرلرده یاشادیقلارینا گوره هر آلتی آیدان بیرخسته یانینا گلسئی دیلرده آتانی آغیر وضعیتده  گوروب تابلاشمادان اوزگونده لیک یاشایش لارینا  قاییتمالی اولوردولار؛دونه دونه کوره کن لر ییغیشیب قایین آتانی قوجالار ائوینه آپارماغی مصلحت گؤرنده بالاجا علیرضا ایاق ایره لی قویوب یوخ آتاما اوزوم باخاجاغام دئییه اونلارین آتاسی اولمه میشدن قورو دام دووارینا گوز تیکمه لرینه سَرت جاواب وئریردی؛خالق گوزو قارشیسیندا آتاسینا آتالیق ائله یین علیرضا مکتب صینیفلرینی ده اوغورلا باشا وورارکن کامپیوتر رشته سینده اونوئرسته گیریب الی ایش توتاندا جانیندا مین دردی یاشادان آتاسی اؤن آلتی ایل یاتاق  خسته لیکدن اذییت چکن سونرا نهایت کی حیاتین دَیشیر؛علیرضا بو دونه ده اوز اللرینن آتاسینی مزارا تاپیریشیب تک باشینا گلن قوناقلارینین قاباغیندا دورور؛قایین آتانین قیرخی چیخمامیش ائوی ساتیریق دئییه کوره کن لر بو دونه ده بیله سینی قیسناغا قویاندا اَمی نین پالتارین گوتوروب ائودن چیخمالی اولور؛سیناقلاری سینایان علیرضا بو آندا گنج اولسادا اوز مودورک لوگ ایله اولایلاری آرخادا قویوب اوزونو ایتیرمه دن آتاسی نین ائوینده چیخاریلسادا اوز قازانجی حسابینا ائولنمگ گونلرینه حاضیر لیق ایشلرینی آپارارکن یئنی دن آتا اوجاغی نی ایشیقلاندیرماق ایسته ییر.................

قایین آتامین قارا چانتاسی...............

سحر سحر ایش پالتاری قولتوغومدا فهله میدانیندا دورموشدوم سابیق هم یئرلیمیز خدا قولوکیشی گلدی آی قالایچی مورتوض آروادی بوشاییرام گلیب محکمه قارشسیندا شاهاد گئچه سن؛اوز اوزومه دئیینه دئیینه  قوشولوب عدلییه ایداره سینه گئدنده اورگیمده ویرنیخیردیم دییسن بو گونده ایشیم الیمنن چیخاجاق؛مقصده چاتیب باساقلاری(پیلله) تئز تئز ایکینجی مرتبه یه قالخاراق آرواد دورد اوشاغینان ارینی گؤرن کیمین دوره برده الینه گلن گول قابیلاری گؤتوروب خدا قولو کیشی یه سیری یاندا نهایت کی اینظیباطی مامورلار آراچیلیق ائله ییب ار آروادین ال به یاخا ویریشمالاری آغیز گَپی سویوشه یئندیریلیدی؛ بوغوزونان اوزونو باسا بیلمه یین  آرواد بیر بیر اوشاقلارین الینی توتوب خدا قولویا ساری اوتورنده های باسیردی کی آلا بو سنین اکدیگین اوشاقلار ایشینی یاش گورن خدا قولو منیم الیمنن یاپیشیب اورتایا چکنده اوجا سسین باغیریردی کی آی جاماهات بونون اوشاقلاری دوغماسینا اؤن تانیق وار؛سیز بونا دئیین منیم اکمه گیمه تانیغی گتیرسین؛

ایت ایتی بوغان کیمین یاخامی ار آروادین الیندن آلیب گوذار باشینا قاییداراق اوز اوزومه گولنده  بیر احوالات یادیما دوشدو

آخی بیلیرسیز بیزیم بو قارا چانتالی قایین آتا هر اوچ  دورد آیدان بیر بیزه گلنده خویلو خانیم اونون گتیردیگی کیلو یاریم مرجی نوخودو و آلتی تک دنه قوردو باشی باغلی قویوب اوشاق بویوک بیر یئره ییغیشاندا یئدی قاپی قونشوموشایتی ایله گتیردیگینی آچیب  منیم گوزومه سوخا سوخا نه وارکی آتام بیزه ایللیک زومار گتیریب؛امما گلمه میش قوناق بیزدن گئدنده هئچ ک ک ک به ایداره کشفیاتچی لاریدا بیلمزلر نه آپاریر.................... 

ایسته ییر...............

یئنی یئتمه چاغلاریمدان آتاما قوشولوب گور بولاق آلتیندا سالدیغی بارلی بهره لی باغیمیزا گئد گل ائله ینده  توزلو آلما گوللرینن چیتداییب پامبوق کیمین هیوالارینین تامینان بویا باشا چاتیردیم؛داها دوغروسو بو باغدا یئره کوک سالمیش جانلی آغاجلار قارا توت؛ گیرده کان؛ هیوا؛آلبالی؛ گیلاس؛ اریک؛آرخ قیراغی سال سیرا چینارلار؛ منیم تویوش(خیال)وارلیغیمی یام یاشیل لیغا دوغرو آپاریب اوزومده یاشلاشاراق گئد گئده سئوگی هاواسینا کوکله نیردیم؛هردن تنگه باجادا اورک وئردیگیم  قیزا گوز ویراندا سئویب سئویلمه گه جان آتیب داشلارین چاتین نان آخان سو کیمین حزین بیر زومزومه منی اوزونه چاغیریردی؛باغیمیزین گؤزلیگی  کیمین یوخولاریمین بزه گینه دونن بو گوزلچه نی بیر آندا خیالیمنان چیخارا بیلمیردیم؛هردن داراشلیق کوچه ده  قارشی قارشی یا گلنده اورکک باغیشلارینان نه دئمگینی باشا دوشمه ینده اوزومه قاپانیردیم؛نهایت بیرگون کونلون آلیب قارداشلاری گورمه سین دئییه باغیمیزا آپارماق ایسته ینده الینده بیر موی فیدانی نی گوتوروب منیم له باغا گلمه لی اولودو؛بیربیریمیزدن آرالی باغی بوتانی دولاندیقجا آل چیچکلردن دریب یاخاسینا تاخماق آدینان یاناغینی اوپمک ایسته ینده الین قاباغا گتیریب بو ایشه مانع اولوردو؛ چوخلو گزیب یورولاندان سونرا چپر آرخاسیندا اولان قولاج قاتلی سویودآغاجی کولگه سینده اوتورمالی اولدوق؛من یئنی دن قیزین یایلیغی نی گؤتوروب الیمی ساچلارینا اوزاداندا  دالی چکیلیب دئدی گوزومه دَیین کیمین بو باغین اوزومو آغاجی اولمادان گتیردیگیم موی موماسینی بو سویود آغاجی نین یانینا اکمک ایسته ییرم؛اوزومو بیلمه دن بیر آندا آغاجا سویکه نیب یئریمده قورویوب قالاندا گؤردوم؛قیز اینجه بارماقلاریمنان یئری دئشیب مومانی باسدیرا باسدیرا هردن باشین قالدیریب دایاندیغیم سویود آغاجی نین بوی بوخونونا سای گئچیر؛دوداغیمدا مزه حسرتی قالان کیمین بو دونه ده اوو الیمنن چیخیب گون آشیری یاشایشا قایتمالی اولدوق؛ایللر دوندوکجه اوزوم بوتاسی یئره کوک سالیب اورک شکیلی یارپاقلارینان اوتانقاج سویود آغاجینا دولاشا دولاشا اوزونه یئر آچیب قول بوینونا دولادیقجا گونش شویکه لرینده اوننان اسیرگه ییردی؛ایل دولاندی عومور گئچدی نوه الیمی توتان چاغلاریمدا بیر دونه ده او گونلره خاطیرلاییب باغا یولوم دوشنده گوردوم داغ دوزوملو سویود قورو خول بوداقلارینان هله ده باشینا دولاشمیش اوزوم سالخیم لاری آلتینان تابلاشا تابلاشا نَسه دئمک.............