تونقال

آلتی یئددی گون اولاردی کی ائویمیزده باکی تئلویزی یا کاناللاری قاریشاراق بو دری دیللیلرین یایدیقلاری تئلویزییا کاناللارینا باخماق مجبوریتینده قالمیشدیم؛کئچن گئجه آپیشدان(آمئرکان) یاییملانان ایران فرادا آدلی تئلویزی یادا اولکه داخیلی اویماقلار دیلی حاققیندا سوز صحبت گئدیردی؛وئرلیشه چاغیریلان دری دیللی بیر ننه سی نین اوغلو ایران چرچیوه سینده یاشایان تورک اویماقلارینی آدی گئدن اولکه یه سونرادان گلیبلر دئییه بیر دونه وارلیغیمیزی شیعه چیلیک بایراغی آلتیندا یاشایان آریا چیلارا تهلوکه سانماغین نان اوز مکیرلی سیاستلرینی یوردوتمک ایسته ییردیرلر؛ایران دویلت چیلیگی نین تورک تاریخ و مدنییتی حاققیندا مسولییت داشمادیغینی وورقولایان گئده چه بیزلرین وطنداش حقوقوموزودا کولگه ده قویماق ایسته ییردی؛

قان قالاغیم قاریشان کیمین تئلویزییانین خوتون آلاراق ایرحمتدیک ایسماعیل حیدرینین دانیشدیغی بیر حکایه نی یادیما سالدی؛

او ایرحمتدیک دئییردی

بیر گون ایاغ اوستو ال وئر ائله یین بیر *چودارین یولو اوزاق کتدن بیرینه دوشرکن گورور جاماهات بیرباشی دوگونلو تلیسی گتیریب تونقالدا یاندیرماق ایسته ییرلر؛آهیل کیشی تلیس ده نه اولدوغونو سوروشاندا کتدیلر دئییرلر بیر ایلاندیر کی مئشه قضنفرین اینگینی چالیبدیر؛بیز ایسه اونو جازالاندیرماغیچین اوتدا یاندیرماق ایسته ییریک؛چودار ایاق ایره لی قویاراق دئییر آی کورمال جاماهات سارساخلامایین کی ایلانین ایشی چالماقدیر؛ خولاصه کتدیلری بوایشدن چکیندیرن کیمین ایلانی اونلارین الینن آلاراق اوزینن آپارمالی اولور؛ اوزون مسافه یول گئدن نن سونرا بیر بولاغین باشینا چاتیر؛ال اوزونو یویوب سودان ایچینن سونرا ایرحمی گلن کیمین اوز اوزونه دئییر یاخشی سی بودور بو اللاهین دیلسیز آغیزسیز حیوانی تلیسی دن چیخاریب آزادلیغا بوراخیم؛ایلانی تلیسدن چیخارداراق حیوان بولاغین گوزونن سو ایچینن سونرا کوشوللویه کوشوللویه کیشینی اوستونه قالخیب بیله سینی چالیر؛کیشی حیاتینی تهلوکه ده گورن کیمین اوزونو ایلانا توتاراق سوروشور من سنی کتدیلرین الینن آلماغینان اولومنن قورتاردیب سن ندندیر کی یاخشیلیغا یامانلیق ائله ییب منی چالماغینان اولدورمک قرارینا گلدین؛ایلان زهرین توکن نن سونرا جاواب وئریر؛سنین سهوین اودورکو ایندی یه کیمین بیلمه ییبسن کی تولکونون ایشی بوداماقدیر؛اولاغین ایشی تپیک آتماقدیر؛ایتین ایشی قاپماقدیر؛و ................ ____________________________________________________ چودار:مال قارا ال ساتی ائله ییم کیمسه