تونقال

سونونجو ایللر یئنی تئکنوگویا دئییه کانکا(خرمن کوب) اوز یئرینی آت اولاق ولینن عوضله میشدیر؛بیلدیگینیز کیمین کانکا گلمه میشدن جاماهات مین زحمتینن اکیب بیچدیگی زومارینی خرمنده هئشن ائله ییرک سیراوی آت اولاغین دالینا ول قوراشدیریب دویمه لی اولاردیرلار؛بو ول سورمک بیزیم کتده اوزونه مخصوص عنعنه ایله باشلاییب قاباغا گئدردی؛او عنعنه لردن بیریسی بویودور کو عایله لر تانری یا یالواردیرلار کی اونلاریندا اوغلان اوشاق لاری اولاراق ول اوستودنده اوتورمالی اولسون نار؛بیرینجی یئنی دوغولان اوغلان اوشاغینی ول اوستونه میندیرمک عنعنه سی چوخلو طمراقلا باش توتمالی اولاردی؛چونکو بیرینجی اوغلانی اوشاغینی ول اوستونه میندیرمک ایسته ینده موطلق اونو اوغلان اوشاغی اولمایان عایله نین زنه نینه حواله ائله ییردیرلر؛چونکوبئله دوشونوردولر هر ائولی قادین بیرینجی دونه اوغلان اوشاغینی ول اوستونه میندیرمک شانسینی تاپسا گلن ایل خرمن واقدینا اوغلو اولاجاقدیر؛ائشیتدیگیمه گوره بیزیم عایله ده آتام نان آنام حیات قوران نان سونرا بئش ایله یاخین اوشاقلاری اولمامیشدیر؛بیر ایل اوخاریدا آدینی صادالیغیم عنعنه یه صادیق قالان آنام کیمسه نین اوغلان اوشاغینی وله میندیرمک شانسی نی الده ائله ییرک ایل باشینا من دونیایا گلمه لی اولورام؛من دونیایا گله رک آدیمیدا ائله ولیش قویورلار؛یادیما گلن نن یاخین قونوم قونشو ولیش آدینان بیله می صادالایاراق داها آتا بابا عنعنه لرینه صادیق قالاردیرلار؛امما نه دئمک کی کانکا گلن نن سونرا ول ییغیشیلیب یوز ایللر قاتیندا یاران نان عنعنه لریمیزده کولگه ده قالمالی اولورلار؛کانکا کندیمیزه گتیریلن نن سونرا کند قوچاقلاری اونو ایشله ده بیلمک آرزیسین نان یاشایاراق بیربیرین نن یاریش کئچیرتمه لی اولوردولار؛سونونجو ایللربو یاریشمایا غالب گلن عمیم شخصا کانکانی ایشلتمک شانیسینی ائله مه گینن یئرری جاماهاتین خرمنینی دویمه لی اولور؛دوزونو دئسم عمی مینده کانکا ایشلتمه سی داها جوشقویلا باشلاییب داوام ائله ییردی؛چونکو عمیم کانکانی ایشه سالارکن اوجا سسین نن اوخویوب گور سسینی یئنی تئکنولوگییا سسینه قاتمالی اولاردی؛نه یازیق کی بیرگون یئنی دن ایشینه باشلایان عمیم بیلمه دن قولونو کانکایا وئره رک اولوم دیریم آن نارینی یاشمالی اولور؛جاماهات ییغیشیب عمیمی هله لیک اولوم جایناغین نان قورتاراراق شهر خسته خاناسینا یئتیرمه لی اولورلار؛یازیق کیشی آیلارینان خسته خانادا یاتیب داوا درمان اولونسادا سونرالار اونون قول ناحیه سینده عمله گلن ناسازلیق شخصی حیاتیندا لنگ لیک یاراتمالی اولور................